بالصور .. قائد الأهلي السابق يفتح النار على مقدمي برنامج "الزمالك اليوم"

بالصور .. قائد الأهلي السابق يفتح النار على مقدمي برنامج "الزمالك اليوم"

هاجم شادي محمد قائد الأهلي السابق، مقدمي برنامج "الزمالك اليوم" وفي مقدمتهم خالد الغندور، وكل ضيوف البرنامج من نجوم الفريق الأبيض القدامي، متهمًا إياهم بـ"التطبيل" لرئيس القلعة البيضاء مرتضي منصور وتنفيذ تعليماته وأوامره، وأنهم باعوا كرامتهم مقابل "الفلوس".

 

وكتب شادي محمد عبر حسابه الرسمي على موقع "فيسبوك": "اللي بيشتغل في مكان عشان سبوبه أو بيستحمل الشتيمه والتهزيق في رسايل الواتساب ويتقاله قول ايه ومتقولش ايه ويبيع نفسه وكرامته ويخسر كل حاجه عشان قرشين يقبضهم اخر الشهر بيحس بالدونيه ومن الاخر بيبقا جسمه نحس من الكلام بدون الدخول في نقاش كتير وكلام مرسل احب اقولكم انكم شوية مطبلاتيه بتاكلو على كل الموائد وصدقوني احنا غير فمش عشان انتو ده تفكيركم كده وعقليتكم كده يبقا الناس كلها زيكم احنا في الاهلي مختلفين عنكم كتير".

 

وأضاف: "مش معنى اني كنت مؤيد وداعم للمهندس محمود طاهر اني لما اشوف كابتن الخطيب ومجلسه في ازمه اقف اتفرج او ما ادعمهمش او افرح فيهم زي ما بيحصل عندكم احنا اتربينا في الاهلي اننا ايد واحده احنا وجمهورنا وفي ضهر مجلس ادارتنا ولا نسيئ للمجلس اللي قبله".

 

وعلق قائد الأهلي على قرار إيقاف برنامج "الزمالك اليوم" وظهوره على قناة "الرافدين": "طالعين في القناه الجديدة اللي الاستوديو بتاعها قد كشك السجاير اللي على اول الشارع عندي وعمالين تغلطوا في خلق الله وتتريقوا عالناس انا عايز دكر فيكم يطلع كده يشيد بالعتال او ممدوح عباس أحمد سليمان في البرنامج عندكم وانا واثق انه هيتبعتله رسايل عالهوا وشتيمه بامه وابوه ومش هيكمل دقيقه وحصلت وهتحصل وبتحصل معاكم كل يوم بس صدقوني انتو بعتو نفسكم بالرخيص".

 

وواصل: "يكفيني ان اللي بيشتمني ويهاجمني سارح ببدلته على كتفه ومش عارف هيطلع فين انهارده هل في الحدث والا المحور والا الرافدين كل ده مش مهم المهم انه يرضي "بابا" ويقفش القرشين لكن الكرامة والمبدأ دية أخر حاجه تفكروا فيها صدقوني انتو فقدتم قيمتكم".

 

وأضاف:" أنا لا بدافع عن مجلس عشان ارجع القناة ولا بدافع عنهم عشان عايز منهم حاجه انا بعمل اللي يميليه عليا ضميري واللي اتربيت عليه جوه النادي اللي خيره عليا انا لو ببص لشغل في قناه كنت ممكن اشتغل من زمان في قنوات كبيره واقبض بالدولار لكن عشان كان اتجاهها الهجوم على الاهلي والاساءة لمجلسه رفضت وفي قنوات انا نزلت فيها فعلا واشتغلت ولما لقيت توجههم الهجوم ع الاهلي برضه اعتذرت عن استكمال البرنامج".

 

وأكمل: "لو انا بساند المجلس عشان ارجع القناة فمن باب اولى كنت اكمل هجوم عليهم وهشتغل في قنوات بمرتبات متحلموش بيها وانول الرضا من ناس تحلموا تتكلموا معاهم لكن زي ما قلتلكم لا تربيتي ولا مبادي الاهلي اللي اتربيت فيها تقول كده".

 

وعلق "شادي" على تصريحات رئيس الزمالك حول استعانة الأهلي بـ"ساحر سنغالي" قائلًا: " من الاخر ركزوا مع الساحر السنغالى دمتم اضحوكة .. وانا فى البيت عامل خرم فى دماغك فبلاش أعمل برنامج أحسن".